"Itsatsita Berriz" EiTBn, Jon Plazaola eta Leire Martinezekin
Asteazken honetatik landa, fikzio musikalaren atal berri bat eskainiko da Instagramen egunero, eta urriaren 25ean PRIMERAN plataforman estreinatuko da.
« Itsatsita » fikzio musikalaren bigarren etapa ate joka dugu. 2023an estreinatu zen instaseriearen jarraipen honetan, 40 urte inguruko bikote bat kateaturik geldituko da auto batean harremanak izan bitartean. Osasun-profesionalek ezin dute sinetsi: Penis captivus kasu bat, berriz ere!
Bikotea itsatsita dagoen bitartean, zalantza existentzialak partekatzen dituzte, baita beren beldurrak eta ametsak ere. Protagonistek, ordea, banandutako bikoteen alabak dituzte. Nola erreakzionatuko ote dute?
EiTBk "Itsatsita Berriz" fikzio musikala aurkeztu du asteazken honetan Donostia Zinemaldia nazioarteko festibalean. Instagramen @itsasita_eitb gunean egunero atal berri bat ikus liteke jadanik. Bestalde, urriaren 25ean, PRIMERAN plataforman agertuko da ere.
Pausoka ekoiztetxeak EiTB Mediarentzat egin duen fikzio musikal honetan, Leire Martinez La Oreja de Van Gogh taldeko kantaria aktore lanetan ikusiko dugu lehen aldiz; Jon Plazaola, berriz, estreinakoz arituko da musikal batean.
Bestalde, Iker Huitzi Demodé Quartet taldeko kidea ikusiko dugu berriz ere erizainaren paperean. Aktore taldean daude, halaber, "Itsatsita"ren lehen edizioan protagonista izan zen Gari Uriarte (Dupla taldeko abeslaria), Ane Lukin kantaria eta "Go!azen" telesailean ezagutzera eman den Aitziber Errazkin gaztea.
